ပရီးမီးယားလိဂ်ချန်ပီယံဆုကို လီဗာပူးလ် ခပ်လွယ်လွယ်သိမ်းပိုက်လိုက်တယ်။ နှစ်ပေါင်း (၃၀)ကြာ သူတို့တောင့်တနေတဲ့ အောင်မြင်မှုကြီး ပိုင်ဆိုင်ခဲ့ပြီ။ ဒီဘက်နှစ်ထဲမှာ လီဗာပူးလ်ရဲ့ အောင်မြင်မှုတွေဟာ တုန်လှုပ်စရာကောင်းတယ်။ မချီးကျူးဘဲနေလို့မရဘူး။ Klopp Dynasty မှာ ချန်ပီယံလိဂ်ရတယ်၊ ဥရောပစူပါဖလားရတယ်၊ ဖီဖာကလပ်ကမ္ဘာ့ဖလားရတယ်။ နောက်ဆုံး ပရီးမီးယားလိဂ်ဖလားရတယ်။ လီဗာပူးလ်ရဲ့ အောင်ပွဲဆာလောင်စိတ်နဲ့ တိုက်ပွဲဝင်စိတ်ဓာတ်က မြင့်မားပြင်းထန်နေဆဲပဲ။ ဒါပေမဲ့ သံသယမေးခွန်းတွေ ရှိနေသေးတယ်။ လီဗာပူးလ်က ပြီးပြည့်စုံတဲ့အသင်းဖြစ်သွားပြီလား၊ ကစားသမားသစ်မဝယ်ရတော့ဘူးလားဆိုတာပဲ။